Mat 11 | NdeIBE | STEP | UJesu wathi eseqedile ukweluleka abafundi bakhe abalitshumi lambili wasuka kuleyondawo ukuyafundisa lokutshumayela emadolobheni aseGalile.

Matthew 11

UJesu LoJohane UMbhaphathizi

1 UJesu wathi eseqedile ukweluleka abafundi bakhe abalitshumi lambili wasuka kuleyondawo ukuyafundisa lokutshumayela emadolobheni aseGalile.

2 Kwathi ukuba uJohane ezwe esentolongweni ukuba uKhristu wayesenzani wathuma abafundi bakhe 3 ukuyambuza bathi, “Unguye yini ozayo kumbe silindele omunye na?”

4 UJesu waphendula wathi, “Buyelani liyobika kuJohane lokhu elikuzwayo lelikubonayo: 5 Iziphofu zenziwa zibone, abaqhugezayo bayahamba kuhle, labo abalobulephero bayasiliswa, izacuthe ziyezwa, abafileyo bayavuswa, lezindaba ezinhle ziyatshumayelwa kubayanga. 6 Ubusisiwe umuntu ongakhubekiyo ngenxa yami.”

7 Kwathi abafundi bakaJohane sebesuka uJesu wasekhuluma labantu ngoJohane esithi: “Ekuphumeni kwenu lisiya enkangala lalisiyabonani na? Umhlanga owawuzunguzwa ngumoya na? 8 Nxa kungayisikho, pho lalisiyabonani? Indoda eyayicecile na? Hatshi, labo abagqoka izigqoko ezinhle basezigodlweni zamakhosi. 9 Pho laphuma lisiyabonani na? Umphrofethi? Yebo, ngiyalitshela, odlula umphrofethi. 10 Lo nguye okwalotshwa ngaye ukuthi: ‘Ngizathuma isigijimi sami sikwandulele, esizalungisa indlela yakho phambi kwakho.’

11 Ngiqinisile ngithi: Phakathi kwabo bonke abazelwe ngabesifazana akukaveli loyedwa omkhulu kuloJohane uMbhaphathizi; ikanti lowo ongomncinyane kakhulu embusweni wezulu mkhulu kulaye. 12 Kusukela ezinsukwini zikaJohane uMbhaphathizi kuze kube manje umbuso wezulu wala uqhubeka ngamandla ngokuba abantu abalamandla bawubambile.

13 Ngokuba bonke abaPhrofethi kanye loMthetho baphrofetha kwaze kwafika uJohane.

14 Ngakho uma likwamukela lokhu, ungu-Elija okwathiwa uyeza. 15 Lowo olezindlebe zokuzwa, kezwe.

16 “Kambe ngingasifananisa lani isizukulwane lesi na? Sinjengabantwana behlezi emkambo bememeza abanye besithi:

17 “ ‘Salitshayela umqangala, kodwa kaligidanga; salihlabelela ihubo lokukhala kodwa kalililanga.’

18 Phela uJohane wafika engadli futhi enganathi basebesithi, ‘Uledimoni,’ 19 INdodana yoMuntu yafika yadla yanatha, bathi, ‘Nansi isidli lesidakwa, umngane wabathelisi le“zoni.” Kodwa-ke ukuhlakanipha kuyaziveza ukuqonda kwakho ngezenzo zakho.”

Maye Kuleyomizi Engaphendukanga

20 UJesu waseqalisa ukuwasola amadolobho lawo lapho imimangaliso yakhe eminengi yayenziwe khona ngokuba kabazange baphenduke:

21 “Maye kuwe Khorazini! Maye kuwe Bhethisayida! Aluba imimangaliso leyo eyenziwa kuwe yayenziwe eThire leSidoni ngabe kudala baphenduka bembethe izigqoko zamasaka bazithela ngomlotha. 22 Kodwa ngiyalitshela, kuzakuba ngcono eThire leSidoni ngosuku lokwahlulelwa kulalokho okuzalehlela lina. 23 Lawe Khaphenawume, kambe uzaphakanyiselwa emkhathini na? Hatshi, uzatshona phansi ekujuleni. Aluba imimangaliso eyenziwa kuwe yayenziwe eSodoma, ngabe ikhona lalamhla nje. 24 Kodwa ngiyalitshela ukuthi kuzakuba ngcono eSodoma ngelanga lokwahlulela kulakuwe.”

Ukuphumula Kwabakhatheleyo

25 Ngalesosikhathi uJesu wathi, “Ngiyakubonga, Baba, Nkosi yezulu lomhlaba, ngokuba uzifihlile lezizinto kwabahlakaniphileyo labafundileyo, wazambulela abantwana abancinyane. 26 Yebo, Baba, lokhu kwaba yikuthanda kwakho.

27 “Zonke izinto zethulwe kimi nguBaba. Kakho oyaziyo iNdodana ngaphandle kukaBaba, njalo kakho omaziyo uBaba ngaphandle kweNdodana lalabo iNdodana ekhethe ukuba ibembulele yena.

28 “Wozani kimi lina lonke elikhatheleyo lelisindwayo, ngizaliphumuza.

29 Zithwaliseni ijogwe lami, lifunde kimi, ngokuba ngimnene ngithobekile enhliziyweni, njalo lizazuza ukuphumula kwemiphefumulo yenu. 30 Ngokuba ijogwe lami lilula lomthwalo wami kawusindi.”